پێنج لە گەورەترین ئەو سەرقاڵییانە کە کارمەند و کڕیارەکان بۆ خاوەنکارەکانی دروست دەکەن
١. بڕیاردان لەسەر وردەکارییە بچووکەکان (کە دەبوو کارمەندەکە خۆی بیدات):
یەکێک لە گەورەترین کێشەکان ئەوەیە کارمەندەکان بۆ بچووکترین هەنگاو دەگەڕێنەوە بۆ لات. ئەمە وات لێ دەکات لەبری پلاندانان، مێشکت پڕ بێت لە وردەکاری بێ بایەخ.
کاتێک دەسەڵات شۆڕ نەکەیتەوە بۆ خوارەوە، کارمەند دەترسێت هەڵە بکات، بۆیە بۆ هەموو شتێک پرسیارت لێ دەکات.
بۆ نموونە خاوەنی چێشتخانەیەکیت، چێشتلێنەرەکە تەلەفۆنت بۆ دەکات و دەپرسێت: “تەماتەمان کەمە، ئایا بچم دوو کیلۆ بکڕم یان نا؟” لەکاتێکدا ئەمە بڕیارێکە دەبێت خۆی بیدات بەبێ ئەوەی کاتی تۆ بگرێت.
٢. چارەسەرکردنی کێشەی کڕیارە توڕەکان بە شێوەیەکی ڕاستەوخۆ:
زۆر جار خاوەنکار دەبێتە قەڵغانی بەرگریکردن لە هەڵەی کارمەندەکان. کڕیارەکان فێرکراون کە “بەڕێوەبەر” تاکە کەسە کێشەکەیان چارەسەر بکات.
ئەمە کاتێک ڕوودەدات کە کارمەندەکانت فێر نەکراون چۆن مامەڵە لەگەڵ ناڕەزایەتی بکەن یان دەسەڵاتی قەرەبووکردنەوەیان نییە.
بۆ نموونە لە پێشانگایەکی فرۆشتنی کەلوپەل، کڕیارێک دەنگ هەڵدەبڕێت چونکە پارچەیەک لە کەلوپەلەکە شکاوە. فرۆشیارەکە دەڵێت “من دەسەڵاتم نییە، دەبێت خاوەنکار بێت”. تۆش ناچار دەبیت کۆبوونەوە گرنگەکەت جێبهێڵیت تەنها بۆ ئەوەی بڵێیت “بیگۆڕن بۆی”.
٣. ناكۆکی و کێشە کەسییەکانی نێوان کارمەندەکان:
بەشێکی زۆری کاتی خاوەنکارەکان دەبێتە دادگاییکردن لە نێوان کارمەندەکاندا. کێ حەقی بوو؟ کێ قسەی بە کێ وت؟
ژینگەی کار کە یاسای ڕوونی تێدا نەبێت، دەبێتە مەیدانی ململانێ. خاوەنکار دەبێتە ناوبژیوان لەبری ئەوەی سەرکردە بێت.
بۆ نموونە دوو کارمەندی فرۆشتن لەسەر ئەوەی کێ موشتەرییەکەی بەڕێکردووە شەڕیانە تا کۆمیسیۆنەکە وەربگرن. دێنە ژوورەکەی تۆ و نیو کاتژمێر گلەیی لە یەکتر دەکەن و تۆش دەبێت ئاشتەوایی بکەیت.
٤. ڕاستکردنەوەی هەڵەی کارمەندەکان (دووبارە کارکردن):
ئەمە ئەو کاتەیە کە دەڵێیت “خۆم بیکەم باشترە”. تۆ پارە دەدەیت بە کارمەند، بەڵام دواجار خۆت کارەکە تەواو دەکەیت چونکە بە دڵی تۆ نییە.
ئەمە نیشانەی نەبوونی پێوەری کوالێتی و ڕاهێنانی لاوازە. تۆ بوویتەتە پاککەرەوەی هەڵەکان.
بۆ نموونە دیزاینەرێک پۆستێکی سۆشیاڵ میدیا ئامادە دەکات، بەڵام هەڵەی ڕێنووسی تێدایە و ڕەنگەکانی نەگونجاوە. تۆ ناچار دەبیت خۆت دابنیشیت و دەستکاری بکەیتەوە، لەکاتێکدا پارەی ئەو کارەت بەو داوە.
٥. ڕاهێنانی بەردەوام لەسەر هەمان پرسیارە سەرەتاییەکان:
بەهۆی ئەوەی ڕێنمایی نووسراو نییە، هەر کارمەندێکی نوێ دێت، یان هەر کڕیارێک پرسیار دەکات، دەبێت تۆ وەڵام بدەیتەوە.
زانیارییەکان تەنها لە مێشکی تۆدان و نەنووسراونەتەوە، بۆیە تۆ دەبیتە تاکە سەرچاوەی زانیاری.
بۆ نموونە هەموو ڕۆژێک کارمەندەکانت دەپرسن “نرخی ئەم کاڵایە چەند بوو؟” یان “ئەمڕۆ کەی دادەخەین؟” لەکاتێکدا دەکرێت ئەم زانیارییانە بە لیستێک هەڵواسرابن یان لە بەرنامەی کۆمپیوتەرەکەدا هەبن.
چارەسەر چییە؟ (ڕاویژ)
بۆ ئەوەی لەم بازنە داخراوە دەربچیت، ئەم سێ هەنگاوە بنێ:
١. نووسینەوەی ڕێکارەکان: هەر کارێک کە ڕۆژانە دووبارە دەبێتەوە، دەبێت ڕێکارێکی نووسراوی هەبێت. با کارمەندەکە بزانێت ئەگەر تەماتە نەما چی بکات بێ ئەوەی بگەڕێتەوە بۆ تۆ.
٢. دەسەڵات شۆڕکردنەوە: مەترسە لەوەی کارمەندەکەت هەڵە بکات. بڕێک دەسەڵاتیان پێ بدە (بۆ نموونە: مافی گەڕاندنەوەی پارە تا بڕێکی دیاریکراو) بۆ ئەوەی کێشەی کڕیار لە دەرگاوە چارەسەر بێت نەک لە ژووری تۆ.
٣. دامەزراندنی بەڕێوەبەرێکی ناوەندی: ئەگەر ژمارەی کارمەندەکانت زۆرە، کەسێک دابنێ کە ئەرکی مامەڵەکردن بێت لەگەڵ کێشە بچووکەکان، تا تۆ تەنها سەرنجت لەسەر گەورەکردنی کارەکەت بێت.
07503077651