جەنگی نرخەکان

لە جیهانی بازرگانیدا، یەکێک لە باوترین و کوشندەترین هەڵەکان کە خاوەنکاران دەیکەن، بریتییە لە “کاردانەوەی خێرا” بەرامبەر دابەزاندنی نرخ لەلایەن ڕکابەرەکانەوە. ئامارە جیهانییەکان لە بواری ئابووری و بەڕێوەبردن دەریدەخەن کە کەمکردنەوەی نرخ بە ڕێژەی تەنها ١٪، ئەگەر قەبارەی فرۆشتن و تێچوو وەک خۆی بمێنێتەوە، دەتوانێت قازانجی پوخت بە ڕێژەی ١١٪ کەم بکاتەوە! ئەمە ژمارەیەکی مەترسیدارە.

​زۆرینەی کۆمپانیاکان کاتێک دەبینن ڕکابەرێک کاڵاکەی هەرزان کردووە، تووشی شڵەژان دەبن و ڕاستەوخۆ ئەوانیش نرخ دەشکێنن. ئەمە پێی دەوترێت “پێشبڕکێ بەرەو خوارەوە” ، کە تێیدا براوە نییە، بەڵکو ئەوەی کەمترین زیان دەکات براوەیە. بەڵام پرسیارەکە ئەوەیە: ئایا کڕیار تەنها بەدوای نرخی هەرزاندا دەگەڕێت؟ توێژینەوەکان دەڵێن نەخێر؛ نزیکەی ٨٦٪ی کڕیاران ئامادەن پارەی زیاتر بدەن لە بەرامبەر ئەزموون و خزمەتگوزارییەکی باشتر.

​بۆ ئەوەی نەکەویتە داوی کەمکردنەوەی نرخ، پێویستە ئەم هەنگاوانە جێبەجێ بکەیت:

پێویستە ئەوە لە مێشکی کڕیاردا بچەسپێنیت کە ئەوەی تۆ پێشکەشی دەکەیت تەنها کاڵایەک نییە، بەڵکو چارەسەرێکە. کاتێک ڕکابەرەکەت نرخ دادەبەزێنێت، ئەو زۆرجار لە کواڵێتی یان خزمەتگوزاری کەمدەکاتەوە. تۆ دەبێت جەخت لەسەر ئەوە بکەیتەوە کە کاڵاکەی تۆ تەمەنی درێژترە، کێشەی کەمترە و ئەنجامی باشتر دەدات بەدەستەوە. فێری کڕیار بکە کە “کڕینی هەرزان، دووجار کڕینە”.

بەشێکی زۆر لە کڕیاران بەدوای دڵنیاییدا دەگەڕێن. ئەگەر ڕکابەرەکەت هەرزان دەفرۆشێت بەڵام کاتێک کاڵاکە تێکچوو وەڵام ناداتەوە، تۆ دەبێت خاڵی بەهێزت “خزمەتگوزاری دوای فرۆشتن” بێت. پێدانی گرێنتی (زەمانەت) و مامەڵەی شیرین و خێرا، وا دەکات کڕیار شەرم بکات داوای داشکاندن بکات، چونکە هەست دەکات ئەو پارەیەی دەیدات شایستەی ئەو ڕێز و خزمەتە یە.

ڕکابەرەکان کاتێک نرخی یەک پارچە کاڵا دادەبەزێنن، کڕیار دەتوانێت بە ئاسانی نرخی تۆ و ئەو بەراورد بکات. چارەسەر ئەوەیە کاڵاکەت بکەیت بە “پاکێج”. بۆ نموونە، لەجیاتی تەنها مۆبایلێک بفرۆشیت، مۆبایلەکە لەگەڵ کەڤەرێک و خزمەتگوزاری دابەزاندنی بەرنامە بە نرخێکی کەمێک گرانتر بفرۆشە. بەم شێوازە کڕیار ناتوانێت ڕاستەوخۆ نرخەکان بەراورد بکات چونکە ئەوەی تۆ دەیدەیت شتێکی جیاوازە و تەنها کاڵا ڕووتەکە نییە.

هەموو کەسێک کڕیاری تۆ نییە. ئەو کەسانەی تەنها بەدوای هەرزانترین نرخدا دەگەڕێن، زۆرجار دڵسۆز نین و بە کەمترین گۆڕانکاری جێت دەهێڵن. وزەی خۆت بۆ کڕیارێک تەرخان بکە کە بەدوای کواڵێتی و متمانەدا دەگەڕێت. کاتێک پەیامی ڕیکلامەکانت دەگۆڕیت بۆ “تایبەت بەوانەی بەدوای باشترین دەگەڕێن”، جۆرێک لە کڕیار ڕادەکێشیت کە نرخیان لا مەبەست نییە بەڵکو ئەنجامیان دەوێت.

بەپێی توێژینەوەیەکی دەزگای (PwC)، ٣٢٪ی کڕیاران ئامادەن دەستبەرداری براندێک بن کە خۆشیان دەوێت تەنها دوای یەک ئەزموونی خراپ، تەنانەت ئەگەر نرخەکەشی هەرزان بێت. ئەمە دەیسەلمێنێت کە مانەوە و دڵسۆزی کڕیار پەیوەستە بە هەست و ئەزموونەوە نەک تەنها ژمارەی سەر پسووڵەکە. هەروەها داتاکان دەریدەخەن ئەو کۆمپانیایانەی ستراتیژی جیاکاری (Differentiation) بەکاردەهێنن، قازانجیان ٣٠٪ زیاترە لەوانەی تەنها شەڕی نرخ دەکەن.

شەڕکردن لەسەر نرخ، شەڕێکە کە کۆتاییەکەی دۆڕانی هەمووانە. وەک خاوەنکار، نابێت ڕێگە بدەیت ستراتیژی ڕکابەرەکانت پلانی تۆ دیاری بکەن. بەهێزترین چەکی تۆ بەرامبەر هەرزانی، بریتییە لە دروستکردنی متمانە، پێشکەشکردنی کوالێتی بەرز، و چارەسەرکردنی کێشەی کڕیار بە شێوازێک کە کەسی تر نەتوانێت بیکات. نرخ شتێکە لەبیر دەچێتەوە، بەڵام هەستی ڕازیبوون و کوالێتی هەمیشە لە یاد دەمێنێت.